‘Elkar mugituz egingo dugu’ lemapean, maiatzaren 15etik 25era ospatuko da Euskaraldia, euskaldunak euskaraz aritzera bultzatzen dituen ariketa sozial erraldoia. Hori dela eta, ostiral honetan, martxoak 14, ekitaldi bat egongo da Azaroak 25 plazan, San Pedro elizaren ondoan. 18:00etan izen-emateak irekiko dira, 18:45ean antolatutako egitarau zabala jakitera emango da eta 19:00etan herriko pertsona esanguratsuek ostatutako hamaikakoaren aurkezpena burutuko da. Gainera, herri, talde eta kuadrilla-argazkiak egingo dira 19:15etik aurrera. Herriko erakunde, eragile, talde eta norbanako guztiak ekitaldian parte hartzera gonbidatuta daude.
Aurten, Basaurin 150 entitatetik gora parte hartuko dutela estimatzen da. Hauek dagoeneko izena eman dezakete euskaraldia.eus webgunean. Dinamizatzaileak prest daude laguntzeko 688 746 706 telefono zenbakira deituz edo WhatsApp bidez, eta basauritarrak@euskaraldia.eus helbide elektronikoaren bitartez.
Herritarrek, ordea, martxoaren 15etik aurrera izango dute izena emateko aukera izenematea.euskaraldia.eus estekaren bidez. Bertan, Ahobizi edo Belarriprest rola aukeratu eta norbanakoaren datuak bete beharko dituzte. Internet bidez izena eman nahi ez duten herritarrek, eskuorrien bitartez eman dezakete.
Euskaraldian izena eman eta txapa jaso daitezkeen puntuak ‘Euskaraldia guneak’ izendatu dira: Udala, Udal Euskaltegia eta Bolintxu AEK. Bertan, izena emateko esku-orriak eta Ahobizi eta Belarriprest txapak (maiatzeko lehen astetik aurrera) eskuragarri izango dituzte.
Euskaraldia Basauriko beste mugarrietako bat maiatzaren 10eko ‘Txapa banaketa ekitaldia’ izango da. Bentako jaiekin eta Abarka Egunarekin bat eginda, ariketa soziala martxan hasi baino egun batzuk lehenago egingo da sorpresaz beteriko eguna.
Aurreko edizioetan egin zen bezala, Euskaraldiaren 25 lona handi eskegiko dira herriko hainbat eraikinetan, eta etxeko balkoietan edo saltokien sarreran jartzeko banderolak ere eskuragarri egongo dira. Bide berean, Basauritarrak irudi-nortasun berriaren pegatinak banatzen ari dira izen-emate guneetan, besteak beste.
Herriaren girotzean laguntzeko asmoz, egitarauarekin batera, @basauritarrak online kanalak erabiltzen ari dira Talde Eragileko kideak: Facebook, Instagram, Tik Tok eta X sare sozialak, eta baita WhatsApp bidezko mezu kateak ere.